Páirceanna Náisiúnta
Tá sé Pháirc Náisiúnta in Éirinn. Cliceáil ar an léarscáil thíos chun breathnú ar a thuilleadh faisnéise ar Pháirc Náisiúnta.
In 1969, mhol an tAontas Idirnáisiúnta ar son an Dúlra a Chaomhnú (IUCN) go gcomhaontódh gach rialtas leis an téarma 'Páirc Náisiúnta’ a choinneáil le haghaidh limistéar a raibh na tréithe seo a leanas acu ar fad:
Áit nach bhfuil éiceachóras nó roinnt éiceachóras athraithe go hábhartha de bharr daoine a bheith á shaothrú nó ina gcónaí ann; mar a bhfuil speicis phlandaí agus ainmhithe, láithreáin agus gnáthóga geomoirfeolaíocha arb ábhar suntais ar leith iad ó thaobh na heolaíochta, an oideachais agus caithimh aimsire nó ina bhfuil tírdhreach nádúrtha fíorálainn;
Sa chás go bhfuil bearta déanta ag an údarás inniúil is airde sa tír chun teacht roimh shaothrú nó chónaí infhéideartha sa limistéar ar fad nó saothrú nó cónaí den sórt sin a dhíothú a luaithe agus is féidir agus chun meas ar ghnéithe éiceolaíochta, geomoirfeolaíochta nó aeistéitiúla, a d’fhág gur bunaíodh an limistéar mar pháirc náisiúnta, a fhorfheidhmiú go héifeachtach;
Mar a dtugtar cead do chuairteoirí dul isteach, faoi choinníollacha speisialta, chun críocha inspioráide, oideachais, cultúir agus caithimh aimsire.
Is é beartas na Roinne Comhshaoil, Oidhreachta agus Rialtais Áitiúil, beartas ar thacaigh rialtais i ndiaidh a chéile leis, go gcloífear leis na critéir agus na caighdeáin le haghaidh Páirceanna Náisiúnta faoi mar atá leagtha síos ag an Aontas Idirnáisiúnta ar son an Dúlra a Chaomhnú.
